تخيل يا صديقي لو طلع لك مارد في يوم من الأيام وخيرك بين أمنيتين، الأمنية الأولى إنك تكون انسان متخفي والثانية إنك تطلع لك جنحان وتقدر تطير وش ممكن تختار من بين هذه الأمنيتين؟
غالبا بتكون الآن سرحت بالتفكير وبديت تتخيل نفسك طاير بالسماء وتروح على الأماكن اللي ودك تروح لها من زمان، أو سرحت بالتفكير وتخيلت إنك انسان متخفي وجالس تتجسس على الناس وتسمع وش يقولو بدون ما يدرون عنك.
بس سؤال!!
هل فكرت بالأثر اللي راح ينعكس عليك من هذه الخيارات في المستقبل؟ غالباً راح نختار قراراتنا لحظياً بدون ما نفكر وش راح تسبب لنا هذه القرارات في المستقبل.
واحنا في المدرسة تعلمنا أشياء كثير ولكن ما تعلمنا كيف ممكن نتخذ قراراتنا المهمة مثلاً:
وش ممكن أتخصص؟
متى ممكن أتزوج؟
هل أبقى في هذه الوظيفة ولا أغيرها؟
القرارات اللي مثل هذه راح يستمر أثرها في حياتك لفترة طويلة جداً، إذا ودك تعرف كيف تختار قراراتك وطريقة دراستها بعناية؟ لقينا لك طريقة تساعدك كيف تأخذ أي قرار في حياتك بشكل جداً سليم ومدروس، هذه الطريقة جات من العالم
"ستيفن جونسون" سماها بـ " أدوات تحليل القرار" وقسمها لثلاث مراحل وهي:
- خريطة القرار، وهي إنك تكتب كل التفاصيل المختصة بهذا القرار على ورقة بمثابة صنع الخريطة لاتخاذ القرار.
- التنبؤ والمحاكاة، وهي إنك تشوف قرارك في المستقبل كيف ممكن تكون نتائجه.
- اتخاذ القرار، وهي كتابة سلبيات وإيجابيات هذا القرار، وبعد كذا ممكن تكتشف بطريقة تخيلية انه وزن السلبيات أثقل من وزن الإيجابيات أو العكس، عشان كذا ضروري نعرف اننا معرضين لقرارات خاطئة وغالباً القرارات ما تكون صح ١٠٠٪ أو خطأ ١٠٠٪ أو قد تكون نسبية. لذلك يا صديقي القارئ من المهم انه يكون عندك إدراك واسع ورؤية أوسع والأهم من هذا يكون عندك بعد نظر والتفكير في المستقبل والجوانب السلبية المصاحبة لهذا القرار.
